Gipaambit sa aktres nga si Yasmien Kurdi ang mga pagsulay nga giatubang sa ilang pamilya human sa insidente sa iyang anak nga giingong nakasinati og pagpang-bully sa eskwelahan.
Matud ni Yasmien, naospital ang iyang anak sulod sa duha ka semana tungod sa anxiety ug miagi og unom ka bulan nga therapy human sa insidente niadtong Disyembre 2024.
Tungod sa grabeng stress ug kabalaka, gidala usab si Yasmien sa emergency room human makasinati og urticaria o grabeng mga pantal sa panit.
Bisan pa niini, nakahukom siya nga mag-eskwela og Law, nga matud niya nakatabang sa pag-atubang sa iyang trauma ug nakahatag og bag-ong tumong.
Gitawag ni Kurdi ang pagtuon og balaod nga iyang “healing ground” tungod kay nakatabang kini nga mapabiling okupado ug nakapokus ang iyang hunahuna sa positibong mga butang.