Giklaro ni Atty. Michael Poa nga walay bisan peso gikan sa buhis sa katawhan ang gamiton alang sa pagdepensa ni Vice President Sara Duterte sa giatubang niini nga impeachment case.
Sa exclusibong pakighinabi sa Bombo Radyo Phil, gipasalig sa abogado nga dili pondo sa Office of the Vice President (OVP) o sa gobyerno ang ibayad sa mga abugado sa Bise Presidente.
Si Atty. Poa, nga miyembro sa defense team ni Duterte, nagkanayon nga personal kini nga kapasidad sa Bise Presidente tungod kay ang kaso walay kalabutan sa iyang opisyal nga trabaho sa gobyerno.
Matud pa ni Poa, gikan sa kaugalingong bulsa ni VP Sara ang tanang galastuhan, lakip na ang suholan sa mga abogado ug ang pagproseso sa mga gikinahanglang dokumento.
Sa pagkakaron, gipahibalo sa defense team nga anaa na sila sa taas nga lebel sa pagpangandam.
Gisugdan na nila kini sukad pa niadtong 2025 sa dihang unang nabutyag sa publiko ang mga reklamo sa impeachment batok sa ikaduhang pangulo
Nagpabiling masaligon ang kampo ni Duterte sa mga ebidensya ug argumento nga ilang ipresentar kung hingpit man nga mapadayon ang impeachment trial.