Gidakop sa kapulisan sa Japan ang 20-anyos nga US Marine nga si Lance Corporal Devin Jacob Ballard tungod sa pagduda sa pagpatay ug pagpangawat sa 39-anyos nga si Anna Yagi sa usa ka hotel sa Naha, Okinawa.
Matud sa kapulisan, kauban sa biktima ang suspek sa pagsulod sa hotel ug nakit-an usab sa CCTV nga migawas kini nga siya ra.
Gituohang nahitabo ang krimen sayo sa Sabado, diin nakit-an sa hotel staff ang biktima nga walay panimuot sa iyang kwarto.
Giingong gikuha usab sa suspek ang iyang pitaka ug backpack. Gilimod ni Ballard ang alegasyon ug nagpabilin sa kustodiya sa Japanese authorities samtang nagpadayon ang imbestigasyon.
Samtang, mipasaka og lig-on nga protesta ang gobyerno sa Japan ngadto sa Estados Unidos ug gipangayo ang hingpit nga kooperasyon sa imbestigasyon ug mas hugot nga disiplina sa mga sundalong Amerikano.
Gipahayag usab sa US Marine Corps nga nakigtambayayong kini sa mga otoridad sa Japan.