Duha na usab ka miyembro sa New People’s Army kon NPA ang nakabsan sa kinabuhi human sa engkwentro batok militar sa Barangay Guilang-guilang, Manolo Fortich, Bukidnon, kagahapong adlawa, Agosto 17, ning tuiga.
Kahinumdoman nga aduna nay unang upat ka myembro sa NPA nakabsan atol sa engkwentro nga nahitabo niadtong Agosto 13, 2025 sa Saldab Complex, Malaybalay City ug Barangay Dumalaguing, Impasug-ong.
Ang mga 4 ka nakabsan giilang sila si Noel Gabote alyas “Julius/Jose,” Bador Arrellano alyas “Choy,” Noel Domino alyas “Noel/Jairo/Renz,” ug Roxanne Saraus alyas “Sham/Yanda/Yas/Nine.” Base sa kumpirmasyon sa 403rd Infantry “Peacemaker” Brigade nga nakumpiska usab sa operasyon ang usa ka high-powered firearm ug ubang gamit panggubat.
Sa pakighinabi sa Bombo Radyo Malaybalay kang Col. Joe Patrick Martinez, tigpamaba sa 4th Infantry “Diamond” Division, miluwat kini nga gisiguro sa mga kasundalohan ug sa gobyerno nga adunay hustong pag-turn over sa mga patay’ng lawas ngadto sa ilang pamilya uban ang tabang sa dokumentasyon, transportasyon, ug uban pang kinahanglanon.
Gibutyag usab ni Col. Martinez, nga padayon ang clearing operations ug gitutokan karon ang probinsya sa Bukidnon gumikan sa presensya sa NPA ilawom sa North Central Mindanao Regional Committee (NCMRC).