Nakatingkagol na sa selda sa kapulisan ang giilang Top 3 Most Wanted Person sa lebel probinsya human malampusong nasikop sa gikasang operasyon sa Sitio Sagpang, Barangay Maluko, Manolo Fortich, Bukidnon, niadtong Abril 10, 2026, sa alas 9:25 sa gabii.
Base sa report gikan sa Bukidnon Police Provincial Office (BPPO), ang nadakpan giila sa tago nga ngalan nga si Alyas “Dodong”, 35-anyos, ulitawo, ug nagtrabaho isip usa ka laborer sa maong dapit.
Nasikop ang suspek pinaagi sa gahum sa warrant of arrest tungod sa paglapas sa R.A. 8353 o ang Anti-Rape Law, ubos sa Criminal Case No. 25-981W nga gipagawas niadtong Disyembre 12, 2025. Tungod sa kabug-at sa kaso, walay girekomendar nga piyansa ang korte alang sa iyang temporaryong kagawasan.
Ang maong malampusong operasyon gipahigayon sa hiniusang pwersa sa Bukidnon 1st Provincial Mobile Force Company (PMFC) ubos sa pagpanguna ni PLTCOL Dave E. Mahilum, kauban ang Wao Municipal Police Station ug ang Bukidnon Provincial Intelligence Unit.
Sa pagkakaron, ang suspek gidala una sa Manolo Fortich Municipal Police Station alang sa saktong dokumentasyon sa wala pa kini hingpit nga giturn-over ngadto sa Wao MPS alang sa tukmang disposisyon ug pagsunod sa proseso sa iyang kaso.