Nakatingkagol na sa selda sa kapulisan ang giilang Top 1 Most Wanted Person sa munisipyo nga lebel human kini malampusong nadakpan sa gikasang operasyon sa Sitio San Carlos, Barangay Kuya, Maramag, niadtong Abril 13, 2026, pasado alas 11:30 sa buntag.
Sa report nga gipadala ni PCOL Oliver Sotto Navales, ang Provincial Director sa Bukidnon PPO, ngadto kang PBGEN Christopher Nortes Abrahano, ang Regional Director sa PRO-10, giila ang dinakpan nga si Edel Jhon Antipolo Oracion, 29-anyos ug residente sa maong lungsod.
Ang suspetsado nasikop pinaagi sa gahum sa Warrant of Arrest nga gipagawas niadtong Marso 31, 2026, tungod sa paglapas sa Republic Act 10591 o ang Comprehensive Law on Firearms and Ammunition. Ang korte nagtakda og piyansa nga mobalor sa ₱120,000 alang sa iyang temporaryong kagawasan.
Ang maong malampusong operasyon gipangulohan sa Maramag Municipal Police Station ubos sa pagpanguna ni PLTCOL Alexander E. Eugenio, kauban ang Provincial Intelligence Unit, Bukidnon 2nd PMFC, ug ang Carascal MPS gikan sa Surigao del Sur.
Sa pagkakaron, ang suspetsado anaa na sa kustodiya sa Maramag MPS alang sa saktong dokumentasyon ug disposisyon. Kini nga kalampusan kabahin sa gipahingusgan nga kampanya sa kapulisan batok sa mga duna’y atraso sa balaod sa tibuok lalawigan sa Bukidnon.