Naghangyo si former President Rodrigo Roa Duterte ug si Sen. Bato dela Rosa sa Korte Suprema nga mapugngan ang implementasyon sa ‘arrest warrant’ gikan sa International Criminal Court (ICC).
Pinaagi sa legal counsel sa mga petitioner, gisumite ni Atty. Israelito Torreon ang usa ka ‘manifestation’ sa Korte Suprema aron magpagawas og TRO o Temporary Restraining Order.
Partikular nga ilang gisumite pinaagi sa electronic filing ang ‘Very Urgent Manifestation’ nga adunay reiterative prayer para sa pag-isyu sa TRO o injunction.
Kini nga aksyon konektado ug na una nga gisumite nga Petition for Prohibition batok kang Executive Sec. Lucas Bersamin ug uban pa, bahin sa pagpadala kang former President Duterte paingon sa The Hague, Netherlands.
Lakip sa ilang hangyo nga mapugngan ang mga awtoridad sa pagpatuman sa ICC warrant, red notice, ug surrender request batok kang Sen. Dela Rosa.
Gihangyo usab sa ilang kampo nga manduan sa Korte Suprema ang Department of Justice (DOJ) ug Department of Foreign Affairs (DFA) nga magsumite og pahayag aron kumpirmahon kung adunay na ba’y arrest warrant gikan sa ICC.
Matud ni Atty. Torreon nga natingala kini kung ngano nga si Ombudsman Jesus Crispin ‘Boying’ Remulla ang nagbulgar nga adunay giingong giisyu nga warrant of arrest ang international tribunal.
Kahinumduman nga giinsistir ni Ombudsman Remulla nga adunay matud pa giisyu nga arrest warrant ang International Tribunal batok kang Sen. Bato Dela Rosa.
Sumala ni Atty. Torreon kinahanglan mag isyu og public apologies si Ombudsman Remulla kung makumpirma nga wala pay arrest warrant nga na isyu ang maong Korte.
Sa kasamtangan, sumala sa DOJ, adunay duha ka opsyon nga mahimong buhaton kon madawat ang arrest warrant kini ang Extradition ug Surrender per se.
Dugang pa niini, nga ikonsidera usab nila ang pagpasaka og kaso kang Ombudsman Remulla.