Anaa sa kustodiya sa Malaybalay City Police Station ang usa ka 39-anyos nga lalaki human niini gidunggab ang laing lalaki sa Barangay Patpat, Malaybalay City, Bukidnon, niadtong milabay’ng adlaw.
Base sa inisyal nga imbestigasyon, misulod ang suspek sa balay sa 39-anyos usab nga biktima aron komprontahon ang asawa niini, nga kaniadto niyang uyab.
Misangpot sa pinakig-away ang ilang komprontasyon hangtod nga giingong mikuha ang suspek og kutsilyo gikan sa iyang sling bag ug gidunggab ang biktima sa liog, wala nga abaga ug wala nga bukton.
Human sa insidente misurender ang suspek sa mga personnel sa Barangay Public Safety Officer (BPSO) nga duol sa lugar, dala ang kutsilyong giingong gigamit sa krimen.
Samtang, gidala dayon ang biktima sa Bukidnon Provincial Medical Center alang sa pagtambal ug gikatahong anaa na sa luwas nga kahimtang.
Gikustodiya karon sa Malaybalay CPS ang suspek samtang giandam ang dokumentasyon ug ang angay nga kaso batok niini.