Boluntaryong misurender ang suspect sa pagpatay ug pagsunog sa usa ka babaeng senior citizen sa Labuagon, Kibawe, ning lalawigan.
Giila ang suspect nga si alyas “Jun” 37 anyos, ug residente sa Purok 2, Barangay Labuagon, Kibawe, ning lalawigan.
Base sa nakalap nga impormasyon sa Bombo Radyo Malaybalay, mihangyo ang suspect sa usa ka Pastor nga mupauban sa Kibawe Municipal Police Station alang sa pagsurrender.
Kahinumdoman nga nahitabo ang maong krimen miaging adlaw, Hulyo 26, diin gikataho nga gihapak sa suspect ang ulo sa biktima gamit ang palwa sa lubi ug gisunog.
Apan sa higayon nga giadtoan sa mga otoridad ang lugar, wala na ang patayng lawas sa biktima ug giingun gipahiluna na kini sa pamilya.
Ang maong biktima gitago sa pangalang alyas “Linda”, 75 anyos nga babaye, balo, ug residente sa maong lugar.
Kasamtangang anaa sa kustodiya sa kapulisan ang maong suspect alang sa tukmang disposasyon.