PANGANTUCAN, BUKIDNON — Gipalig-on pa karon pinaagi sa pag-deploy og mga elite forces ug high-tech nga kagamitan ang gihimong search and rescue operation alang sa 31-anyos nga hiker nga si Alkharj Gomez Zamayla nga nahanaw sa Mt. Kalatungan.
Sa pakighinabi sa Bombo Radyo Malaybalay, gipadayag ni PCPT. Ernie P. Cabrera, ang OIC sa Pangantucan Municipal Police Station, nga pormal nang misalmot sa pagpangita ang 15 ka mga Special Forces combat trackers, duha ka K9 tracker dogs, ug mga drones nga duna’y thermal imaging gikan sa DENR, Del Monte, ug usa ka pribadong kompanya aron daling matultulan ang nahimutangan sa biktima.
Kahinumduman nga si Zamayla lakip sa 63 ka mga indibidwal nga misaka sa bukid, apan nagpabilin kini sa Camp 1 aron magpahulay human matod pa gikapoy, samtang nagpaabot sa sweeper guide. Apan sa pag-abot sa maong guide, misteryoso na kining nahanaw. Gumikan niini, padayon ang operasyon ug nanawagan ang mga otoridad sa publiko nga dinalian nga itaho kon duna’y saktong impormasyon kalabot sa biktima.