Hingpit nga gipadayag sa labor sector ang ilang grabeng kadismaya human nga wala gihapon maapil sa listahan sa mga prayoridad sa bag-ohay lang nga special session sa Kongreso ang giduso nga ₱200 nationwide wage hike—bisan pa man og personal kining gipatawag ni Presidente Ferdinand Marcos Jr.
Sumala kang Atty. Jose Sonny G. Matula, ang Presidente sa Federation of Free Workers (FFW), dako ang ilang kabalaka tungod kay bisan pa man og nakapasa na sa Senado ang ₱100 wage hike ug naaprubahan sa Kamara ang ₱200 nga umento, nagpabilin gihapon kining gibaliwala sa gobyerno luyo sa padayong pagsaka sa presyo sa palaliton ug epekto sa inflation.
Gikumpirma usab ni Matula nga makapila ka higayon na silang niana-ot og usa ka direktang dayalogo ngadto sa Presidente, apan daw duna’y diskriminasyon tungod kay ang sektor sa mga dagkong negosyante ug employers dali rang nakasulod ug naka-miting sa Malacañang, samtang silang nagrepresentar sa mga ordinaryong mamumuo nagpabilin nga wala madungog. Gumikan niini, subli silang nanawagan sa kagamhanan nga dinalian nang aksyonan ang maong balaodnon aron masalbar ang nagkahugo nga purchasing power sa mga trabahante sa tibuok nasud.