Gipanghimakak ni House Prosecutor Terry Ridon ang mga hungihong nga duna kunoy mga mambabalaod nga nakadawat og suhol o maleta nga puno sa kwarta aron mapadali ang impeachment batok kang Bise Presidente Sara Duterte. Matud ni Ridon, lunsay nga walay basehan ang maong akusasyon ug nagtumong lamang kini sa pagguba sa integridad sa nagpadayon nga legal nga proseso karon nga anaa na sa Senado ang pagdungog sa kaso.
Sa pikas bahin, gipatin-aw ni Bukidnon 2nd District Representative Keith Flores ang iyang nahimong desisyon nga pag-abstain sa botohan. Si Flores ang nag-inusarang miyembro sa prosecution panel nga wala mibotar pabor sa impeachment, diin iyang giangkon nga adunay sagol nga personal ug politikanhong rason ang iyang baruganan ilabi na nga gikan siya sa Mindanao diin duna gihapoy dako nga suporta ang pamilyang Duterte.
Bisan pa man sa iyang pag-abstain, gipasabot ni Flores nga iyang girespeto ang tibuok proseso sa balaod ug andam kining mosunod sa mga kalamboan karon nga pormal na nga gisugdan ang paghukom sa maong makasaysayanong kaso.