Desidido si kanhing Senate President Vicente Sotto III nga magpasaka og kaso nga libel ug cyberlibel batok sa 18 ka mga testigo nga nagpailang mga kanhing Marines.
Ang maong mga “ex-Marines” miatubang sa Senate Blue Ribbon Committee niadtong Huwebes nga gipangulohan ni Senador Rodante Marcoleta, diin ilang giakusahan si Sotto nga nakadawat og kickbacks gikan sa flood control projects.
Matud ni Sotto, sa Lunes pa masayran kung apil ba sa iyang ipasaka nga kaso ang mga tawo nga nagdala ug nagtudlo sa maong 18 ka testigo.
Samtang si kanhing Blue Ribbon Committee chairperson Senador Panfilo Lacson miingon nga posible usab nga mapasakaan og kaso ang mga senador nga nangulo sa maong pagdungog, tungod sa giingong bogus hearing ug posibleng cyber libel.
Gipunting usab ni Lacson nga walay parliamentary immunity sa maong sitwasyon kung mapamatud-an nga dunay pag-abuso sa proseso sa pagdungog.
Sa laing bahin, gisaway ni Ombudsman Jesus Crispin Remulla ang maong pagdungog tungod kay dunay na usab nga nagpadayon nga imbestigasyon sa giingong anomalya sa flood control projects.