Gikumpirma ni kanhing Anakalusugan Partylist Rep. Mike Defensor nga luwas ug maayo ang kahimtang ni kanhing Marine Sgt. Orly Guteza.
Sa pakighinabi sa Bombo Radyo Philippines, gisaysay sa kanhi mambabalaod kung giunsa siya pagkontak ni Guteza halos duha ka semana na ang milabay aron pagmatuod nga naa kini sa maayong kahimtang.
Matud ni Defensor, dugay usab silang wala nagka-istorya sa kanhing sarhento human sa una niyang pagpakita sa Senado, hangtod adunay usa nila ka kaila nga misulti kaniya nga gipatay na matud pa ang kanhing Marine sergeant.
Apan sumala ni Defensor, nagpabilin gihapon nga luwas si Guteza bisan asa man kini karon nagtago.
Dugang pa ni Defensor, wala siya’y interes nga mahibal-an ang kasamtangang lokasyon sa kanhing sundalo aron mapanalipdan usab ang kaluwasan niini.
Gibarugan usab sa kanhing mambabalaod nga ang gibuhat ni Guteza bunga sa iyang tinguha nga mabutyag ang giingong korapsyon sa flood control projects sa gobyerno.
Apan, makapaguol kaniya ang sitwasyon nga ginapugngan sa gobyerno ang maong kanhing sundalo.
Sigon usab ni Defensor nga nakabati siya og kasuko tungod kay nasayod sila sa kadako sa kahibalo ni Guteza pinaagi mga gibutyag niini apan siya pa hinuon ang giatake.