Nagpadayag si Senator Robin Padilla nga bukas kanunay ang iyang linya alang sa pakigsulti sa aktres nga si Angel Locsin, human sa gipagawas nga open letter sa aktres nga nagkwestyon sa iyang mga baruganan sa politika.
Naggikan ang maong isyu human gikwestyon ni Locsin ang pagtawag ni Padilla sa iyang kaugalingon nga usa ka “komunista” atol sa deliberasyon sa Senado. Gipuna usab sa aktres ang paghilom sa senador sa dihang gi-red-tag siya kaniadto, ingon man ang suporta sa senador kang Pastor Apollo Quiboloy ug ang baruganan niini bahin sa isyu sa Tsina.
Gipahayag ni Padilla nga gipili nila sa iyang asawa nga si Mariel Rodriguez nga dili na lang mobalos og batikos sa social media tungod kay giisip gihapon nilang suod nga higala ang aktres, ug basin aduna lamang kini’y ginaagihan nga personal nga hagit sa kinabuhi.
Dugang pa sa senador, kon ugaling gusto sa aktres nga makig-istorya kanila, abli kanunay ang ilang linya sa komunikasyon aron magkasinabot bahin sa maong usapin.