Gisugyot ni Senador Bam Aquino ang pagdeklarar og state of national emergency tungod sa epekto sa pagsaka sa presyo sa lana sa nasud.
Sumala sa senador, daghang pamilyang Pilipino ang nakasinati na sa grabeng epekto sa pagsaka sa presyo sa gasolina ug diesel, busa gikinahanglan ang dinaliang aksyon gikan sa gobyerno.
Lakip sa mga sugyot mao ang pagpatuman sa price ceiling sa mga batakang palaliton, dinaliang pag-apod-apod sa ayuda nga gihatag sa 2026 budget para sa mga trabahante sa transportasyon, ug suporta para sa mga micro, small ug medium enterprises o MSMEs aron malikayan ang pagsira sa mga negosyo.
Gipasiugda usab sa senador ang kamahinungdanon sa pagpatuman sa mga lakang nga ginasuportahan sa Senado, lakip na ang paghatag og gahum sa Presidente nga suspendihon ang excise tax sa lana.
Gisiguro sa mambabalaod nga ang mga tabang ug programa sa gobyerno kinahanglan nga makab-ot sa katawhan sa tunga sa kasamtangang krisis.