Gipahugtan karon ang seguridad sa mga eskwelahan sa tibuok lalawigan sa Bukidnon aron masiguro ang kaluwasan sa mga estudyante ug mapugngan ang susamang brutal nga insidente sa pagpamusil nga natigayon didto sa Tacloban City.
Sa pakighinabi sa Bombo Radyo Malaybalay kang PCpt. Sheila Joy P. Jangad, ang tigpamaba sa Bukidnon Police Provincial Office (BukPPO), iyang gipahayag nga gilusad na ang mas lapad nga koordinasyon tali sa PNP, DepEd, LGU, ug mga force multipliers alang sa dugang police visibility, threat assessment, ug emergency preparedness.
Nunot niini, gipahibalo ni Bukidnon National High School (BNHS) OIC Everardo Calopez ang striktong pagpatuman sa DepEd Order 006 Series of 2026, diin ipaubay na ang bag inspection sa entrada, paggamit og search stick, ug escort procedures sa mga madudahong indibidwal.
Sa bahin sa lokal nga kagamhanan, gipasalig ni Malaybalay City Mayor Jay Warren Pabillaran ang aktibong papel sa Local School Board pinaagi sa pag-deploy og dugang mga watchmen gamit ang Special Education Fund (SEF).
Gipadayag sa mga otoridad nga pabilin nga hapsay ug walay natalang susamang hulga sa tibuok Bukidnon, apan gikinahanglan ang hugot nga preventive measures ug simulation exercises aron maseguro nga luwas ang mga kampus sa probinsya.