MALAYBALAY CITY — Gipadayag sa Kabataan Partylist Southern Mindanao ang ilang bug-os nga suporta sa impeachment case batok kang Vice President Sara Duterte, dungan sa pag-ingon nga mas milig-on ug mibug-at pa ang mga ebidensya batok sa Bise Presidente samtang nagpaingon ang kaso sa Senado.
Sa pakighinabi sa Bombo Radyo Malaybalay kang Cobbie Jan Canda, ang Chairperson sa maong grupo, iyang gibutyag nga gawas sa kontrobersiyal nga confidential funds, duna pa’y mga bag-ong ebidensya ug testimonya nga nadugang sa reklamo. Lakip niini ang giingong kakuwang sa katinawan sa pondo nga mitalop sa P6.7-billion base sa report sa Anti-Money Laundering Council (AMLC), ingon man ang mga alegasyon sa suholan ug pagpanghulga sa mga opisyal sa gobyerno. Matud ni Canda, ang kalangan sa dagan sa pre-trial nakahatag hinuon og dugang higayon sa prosekusyon aron mapalig-on ang mga basihan, ilabi pa nga wala pa’y gihisgutan nga klarong depensa ang kampo ni Duterte.
Giinsistir usab sa maong lider-kabataan nga “minimum responsibility” o labing ubos nga responsibilidad ni VP Sara isip usa ka taas nga opisyal sa nasod ang personal nga pagtambong sa husay aron tubagon ang mga akusasyon batok kaniya. Gumikan niini, nagkasa na karon og mga serye sa mobilisasyon ug aktibidad sa Mindanao ang ilang grupo uban sa nagkalain-laing civil society groups isip pagpangandam sa unang hearing sa Senado karong Hulyo aron hugtanong isulong ang transparency ug accountability sa kagamhanan.