KALILANGAN, BUKIDNON — Napalgan nga wala na’y kinabuhi ang usa ka 19-anyos nga batan-on human kini gipusil sa likod didto sa Purok 1, Forchacu 4, Barangay Malinao, niining lungsod niadtong Hunyo 22 sa buntag.
Base sa report ni Bukidnon PPO Provincial Director PCOL Oliver Sotto Navales ngadto sa rehiyon, nakadawat og tawag ang Kalilangan Municipal Police Station gikan sa usa ka mabalak-ong lungsoranon kalabot sa patay’ng lawas nga nag-ubo sa yuta. Sa inisyal nga pagsusi, nasuta nga nakaangkon ang biktima og duha ka samad-pinusilan sa ibabaw’ng bahin sa iyang tuo nga likod, diin gihulagway sa iyang pamilya nga wala sila’y nadungog nga buto sa armas sa wala pa madiskubrehi ang krimen.
Sa gihimong pagproseso sa crime scene sa Bukidnon Provincial Forensic Unit (BPFU), narekober sa dapit ang usa ka basiyo sa bala ug upat ka buhing bala sa caliber 9mm. Sa kasamtangan, blangko pa ang mga otoridad sa motibo sa maong pagpamatay ug nagpadayon pa ang hot pursuit ug lawom nga imbestigasyon aron mailhan ug madakpan ang mabuhaton sa krimen.