Posibleng mosunod semana ang rollback sa presyo sa diesel ug kerosene samtang posible gihapon nga mosaka ang presyo sa gasolina, sumala sa Department of Energy.
Matud ni Rino Abad, dako na ang posibilidad nga mous-os ang presyo sa diesel ug kerosene sa sunod nga fuel price adjustment.
Base sa kalkulasyon sa DOE sulod sa unang upat ka adlaw sa trading, posibleng mokunhod og kapin ₱9 kada litro ang diesel samtang mokanaog og mga ₱12 kada litro ang kerosene.
Apan, posible usab nga mosaka og ₱1.60 hangtod ₱1.70 kada litro ang presyo sa gasolina.
Sumala ni Abad nga kung matuman kini, mobalik sa naandan nga sitwasyon diin mas mahal ang gasolina kumpara sa diesel.
Sa kasamtangan, ang posibleng presyo sa diesel mahimong anaa sa ₱70 hangtod ₱95 kada litro, samtang ang gasolina mahimong magpabiling mas mahal sa ₱75 hangtod ₱105 kada litro.
Matod sa DOE, provisional pa ang maong forecast tungod kay base lamang kini sa partial trading data ug mahimo pa nga mausab depende sa lihok sa merkado sa dili pa ipahibalo sa mga oil company ang opisyal nga price adjustment sunod semana.
Ang gipaabot nga rollback misunod sa kusog nga pagsaka sa presyo sa diesel sa milabay’ng mga semana tungod sa epekto sa tensyon sa Middle East nga nakaapekto usab sa fuel supply ug presyo sa Pilipinas.