Gipahugot sa Police Regional Office 10 (PRO-10) ang pagbantay sa mga kalsada batok sa pagpalusot sa smuggled cigarettes ug ilegal nga droga human mailhi ang Northern Mindanao nga usa sa mga nag-unang transit ug transportation point sa maong mga kontrabando sa nasod.
Sumala kay PRO-10 Regional Director PBGen. Christopher N. Abrahano, kadaghanan sa mga operator ug tag-iya sa mga sakyanang gigamit sa smuggling dili nakabase sa rehiyon ug ginagamit lamang ang mga kalsada sa Region 10 nga agianan. Bisan pa man niini, gipasalig ni Abrahano nga ang tanang pangalan ug impormasyon nga ilang nakalap gipasa na ngadto sa higher headquarters aron maapil sa gihimong dossier ug mapasakaan og pormal nga kaso ang mga nakalapas sa balaod.
Dugang pa sa opisyal, nagpabilin usab nga dakong prayoridad ang kampanya batok sa ilegal nga droga—labi na sa Cagayan de Oro City, Bukidnon, ug Lanao del Sur. Gipatuman sa kapulisan ang supply reduction pinaagi sa mga operasyon ug demand reduction pinaagi sa edukasyon sa mga kabatan-onan. Gipatin-aw usab ni Abrahano nga sa mga higayon nga adunay armed encounter, girespeto ug ginasunod gayud ang Police Operational Procedures ug human rights aron mapanalipdan ang kinabuhi sa mga personahe ug sa mga suspek.