ILIGAN CITY — Nasikop sa mga awtoridad ang usa ka 44-anyos nga babaye human nakumpiska gikan kaniya ang gitahapang shabu nga nagkantidad og ₱374,000 pinaagi sa usa ka Search Warrant operation sa Purok 6, Barangay Saray, Iligan City niadtong Agosto 12, 2026, mga alas-4:15 sa hapon.
Nailhan ang suspek nga si alyas “Aiv”, walay regular nga trabaho ug residente sa maong lugar. Nakuha gikan sa posisyon sa suspek ang siyam ka heat-sealed transparent plastic sachets nga nag-contain og suspected shabu nga may gibug-aton nga 55 gramos. Gipatuman ang maong operasyon sa mga nagkahiusang elemento sa kapulisan subay sa Search Warrant No. 26-0316 nga giisyu sa Regional Trial Court Branch 4 alang sa paglapas sa Republic Act 9165.
Nasayran sa inisyal nga imbestigasyon nga second-time offender ang suspek sa susamang krimen ug nakagawas lang sa prisohan niadtong 2024. Tungod sa kakulang sa kita, gihimo niini nga panginabuhian ang pag-apod-apod og ilegal nga drugas sa ilang barangay ug mga silingang dapit. Sa kasamtangan, gitanggong na si alyas “Aiv” sa Iligan City Police Station 5 alang sa pagpasaka og kasong paglapas sa Section 11, Article II sa RA 9165, samtang gi-reaffirm usab ni PRO-10 Regional Director PBGEN Christopher N. Abrahano ang walay-hunong nga kampanya sa kapulisan batok sa ilegal nga drugas.