Gipamatud-an sa Commission on Audit (COA) ang notice of disallowance sa ₱73 milyon nga confidential funds nga gigasto sa Office of the Vice President niadtong Disyembre 21 hangtod 31, 2022.
Sa pagdungog sa impeachment batok kang Vice President Sara Duterte, sumala ni Atty. Gloria Camora sa COA Intelligence and Confidential Funds Audit Office (COA-ICFAO) nga adunay tulo pa ka disallowance nga giisyu nga naglakip sa ₱375 milyon nga gasto sa OVP niadtong 2023.
Una nang gipasabot ni COA Assistant Commissioner Alexander Juliano nga ang disallowance nagpasabot nga ang paggasto mahimong iregular, dili kinahanglan, o sobra.
Sumala ni Camora nga ang pag-isyu sa disallowance nagpasabot nga ang liquidation reports sa OVP sa confidential funds wala mituman sa 2015 Joint Circular nga naglatid sa sakto nga paggamit sa confidential ug intelligence funds.
Ilalom sa maong patakaran, ang confidential funds magamit lamang sa pagpalit og impormasyon alang sa mga programa nga may kalabotan sa nasudnong seguridad ug kahapsay, pag-abang og sakyanan para sa lihim nga operasyon, pagmentinar sa safehouses, pagpalit o pag-abang og gamit para sa covert operations, ug paghatag og reward sa mga informants nga dili empleyado sa ahensya.