Gipunting sa prosecution panel ang kakulang sa panahon sa pagkuha sa mga rekord sa bangko isip hinungdan nganong ulahi na nila natutokan ang alegasyon sa dili maipatin-aw nga yaman batok kang Vice President Sara Duterte sa impeachment trial.
Matod ni House prosecutor ug trial spokesperson Atty. Benjamin Agie Tolosa Jr., naglisod sila sa pagkuha sa mga financial records tungod sa mga pagtutol sa kampo ni Duterte ug sa taas nga proseso sa pagpagawas sa mga dokumento pinaagi sa court-issued subpoenas.
Kahinumdoman nga niadtong Oktubre 13, gibawi sa prosecution ang tulo sa upat ka impeachment charges nga may kalabotan sa paggamit sa confidential funds, bribery ug grave threats, hinungdan nga nahibilin ang Article 2 nga nagtutok sa dili maipatin-aw nga yaman.
Base sa pagsusi sa mga bank records ug uban pang dokumento ni forensic accountant Atty. Alexander Cabrera, natino ang gibanabanang 817.87 milyon pesos nga dili maipatin-aw nga yaman, samtang adunay mas lapad nga kalainan sa mga rekord nga mokabat sa 1.5 bilyong pesos.
Apan, gikuwestiyon sa kampo ni Duterte ang maong mga kantidad. Gipasabot ni Tolosa nga ang mga resulta sa pagsusi sa mga dokumento maoy hinungdan sa desisyon sa prosecution nga ipunting ang kaso sa Article 2.