PANGANTUCAN, BUKIDNON — Gi-terminate na sa mga otoridad ang pormal nga search and rescue operation alang sa hiker nga si Alkharj Zamayla kinsa nahanaw didto sa Kalatungan Range sukad pa niadtong Hunyo 12, 2026.
Sa pakighinabi sa Bombo Radyo Malaybalay kay PCapt. Ernie Cabrera, matod pa nga mobalhin na ang kapulisan ngadto sa investigation phase aron subayon ang laing mga anggulo sa pagkawala sa biktima human nalukop na sa pag-search ang kapin 654 ka hektarya. Gidugang ni Cabrera nga nagtanyag na karon og P60,000 nga ganti ang pamilya ni Zamayla alang sa kinsa man ang makahatag og saktong impormasyon, dungan sa panawagan sa publiko nga i-report dinalian kon duna’y mamatikdan nga kaduda-dudang estranghero sa ilang dapit.
Samtang sa pikas bahin gipadayag usab ni Anecito Torayno, Jr. – Operations Chief Provincial Disaster Risk Reduction and Management Office – Bukidnon nga nakadesisyon ang Incident Management Team nga undangon ang physical search gamit ang drones ug K9 dogs kay halos natuyok na ang tibuok bukid apan wala gyu’y nakit-an nga unod o lawas sa biktima. Sumala ni Torayno, base sa tracking sa ilang reliable nga K9 dog, duna’y dakong posibilidad nga nakagawas na sa Mt. Kalatungan ang maong hiker tungod kay ang mga traces ug tunob niini nagpakita nga pabalik ra usab sa iyang agi.