Nanawagan pag-usab ang Philippine National Police (PNP) kang Senador Ronald “Bato” Dela Rosa nga boluntaryong mosurender aron malikayan ang posibleng bayolenteng komprontasyon sa padayong operasyon sa mga otoridad batok kaniya.
Matud ni PNP spokesperson Police Colonel Allen Rae Co, propesyonal nga nagtuman sa ilang katungdanan ang mga pulis ug walay personalan sa ilang operasyon, bisan pa sa nangaging serbisyo ni Dela Rosa isip hepe sa PNP.
Gipatin-aw ni Co nga tumong sa pulisya nga malikayan ang kadaot sa bisan kinsa, lakip ang mga operatiba ug sibilyan, samtang nagpadayon ang pagpangita sa senador.
Matud niya, susihon pa sa PNP kon gikinahanglan ba ang pagpagawas og wanted poster alang kang Dela Rosa.
Samtang, gipahayag sa PNP nga ilang gitahod ang gibati sa asawa sa senador nga si Nancy Dela Rosa, nga kaniadto nagpahayag sa iyang kasagmuyo sa posibleng pagdakop sa iyang bana.
Bisan pa niini, gipasiugda ni Co nga magpadayon ang kapulisan sa pagtuman sa ilang katungdanan.