Mibiya ang kadaghanang mga delegado nga mitambong sa United Nations General Assembly didto sa New York sa wala pa man mohatag sa iyang pamahayag si Israeli Prime Minister Benjamin Netanyahu.
Nahitabo ang maong paggawas sa mga delegado tungod sa ilang pagpakita og kontra o pagsupak sa gihimong gubat sa Israel ug US batok sa Iran.
Bisan pa man sa nahitabo, wala nagpadala si Netanyahu ug gipadayon gihapon ang iyang pamahayag diin iyang gipaambit nga kinahanglan matud pang magpasalamat ang tanan sa Israel tungod kay kun wala pa nila giatake ang nuclear facilities sa Iran mahimong patay na silang tanan.
Mibalik usab kini sa pagpasigarbo sa pamahayag ni US President Donald Trump bahin sa ilang malampusong pagguba sa Iranian military ug nuclear capabilities.
Gidugang pa ni Netanyahu nga taliwala sa daghang grupo nga kaatbang sa Israel sama sa Hamas, Hezbollah, Houthis, Iran, ingon man ang mga grupo sa Iraq, Syria, ug Palestine, wala na silay laing lig-on nga kauban kundili ang US lamang.