Gipahimangnoan sa People’s Budget Coalition ang publiko bahin sa posibleng pagbalik sa mga anomalya sa flood control projects, ilabi na sa gipunting nga P190 bilyon nga budget insertions sa gilaraw nga 2027 national budget.
Nanawagan ang grupo sa katawhan nga magbinantayon ug mobarog batok sa giingong padayong pagsulod sa mga ‘budget insertion’ sa mga kongresista sa umaabot nga pondo sa nasud.
Matud sa People’s Budget Coalition, ang nasudnong budget dili angay isipon nga personal nga pondo sa mga kongresista, senador, o bisan sa Presidente, tungod kay kini salapi sa katawhan nga kinahanglang gamiton alang sa ilang tinuod nga panginahanglan.
Sa eksklusibong pakighinabi sa Bombo Radyo Philippines, gipasiugda ni AJ Montesa, Co-convenor sa People’s Budget Coalition, nga mahinungdanon ang pagbantay sa publiko sa proseso sa paggahin sa pondo sa gobyerno aron masiguro nga dili kini magamit alang sa personal nga interes sa mga politiko.
Gipunting usab sa grupo nga dili na angay mausab ang mga anomalya sa ‘flood control projects’ nga nahimong sentro sa mga alegasyon sa korapsyon ug sayop nga paggamit sa pondo sa gobyerno kaniadto.
Kini nga mga matang sa kurapsyon dili lamang makahurot sa pondo sa gobyerno apan makababag usab sa tinuod nga kalamboan ug makapahuyang sa pagsalig sa publiko sa administrasyon.
Ang mga ‘flood control projects’ kanunay nga gipunting sa mga alegasyon sa kurapsyon tungod sa ilang dako nga budget ug ang kalisud sa pag-monitor sa kalidad sa trabaho.
Nahinumduman nga atol sa Senate Finance Committee consultation kauban ang mga civil society organizations, gibutyag sa People’s Budget Coalition ang gibanabanang 7,054 ka proyekto nga nagkantidad og P190 bilyon nga giingong gisulod sa gilaraw nga 2027 national budget nga walay igong public documents.
Apil niini ang gibana-banang 6,200 ka ‘public works projects’ nga nagkantidad og P172 bilyon, nga nagpataas sa kabalaka sa transparency ug akuntabilidad.
Tungod niining mga isyu, nanawagan ang grupo sa publiko nga dili magpakahilom ug padayong bantayan ang nasudnong budget aron masiguro nga ang pondo sa gobyerno mapunta sa mga proyekto nga tinuod nga makabenepisyo sa katawhan ug dili sa bulsa sa pipila ka indibidwal.