MALAYBALAY CITY — Gi-engganyo sa Persons with Disability Affairs Office (PDAO)-Malaybalay ang mga pamilya ug ang tibuok katilingban nga hingpit nga dawaton, higugmaon, ug panalipdan ang katungod sa mga kaigsoonang may kabilinggan sa lawas.
Kini ang gipahayag ni PDAO-Malaybalay Head Michelle Timones sa pakighinabi sa Bombo Radyo Malaybalay sa programang Good Morning Philippines, dungan sa pagsaulog sa National Disability Rights Week karong tuiga 2026 nga nagtumong sa paghatag og patas nga partisipasyon ug malahutayong kalamboan alang sa maong sektor.
Ubos sa pagdumala ni Mayor Warren Pabillaran, gibutyag ni Timones nga miabot na sa kapin 6,000 ka mga PWDs ang narekord sa dakbayan ug padayon pa kining nagasaka. Aron matagaan og saktong pagtagad ang ilang espesyal nga panginahanglanon, nagtukod ang PDAO og mga tagsa-tagsa ka support groups alang sa nagkadaiyang kondisyon sama sa autism, Down Syndrome, mga dialysis patients, ug mga bungol o deaf. Gani, isip konkretong tabang sa gobyerno, duna na’y 315 ka mga bata nga duna’y hernia, clubfoot, ug cleft palate ang malampusong napadala ug napaubos sa pagpatambal sa Bukidnon Provincial Hospital.
Taliwala niining mga tabang ug lokal nga kaayohan, giangkon ni Timones nga dako gihapon nga hagit ang diskriminasyon ug bullying nga usahay masakit nga masinati mismo sa mga PWDs sulod sa ilang kaugalingong panimalay. Tungod niini, gihingusgan karon sa PDAO ang usa ka family-oriented nga adbokasiya sa mga barangay aron pukawon ang huna-huna sa publiko nga ang pagka-PWD dili babag sa kaugmaon, kondili nagkinahanglan lamang og saktong pagdawat ug giya aron mapakita ang ilang tinagoang talento ug mahimong mapuslanong kabahin sa komunidad.