MALAYBALAY CITY — Nagpabiling buhi ug lig-on ang lokal nga ekonomiya sa dakbayan sa Malaybalay ug sa tibuok probinsya sa Bukidnon, ilabi na sa sektor sa agrikultura ug negosyo, taliwala sa mga nasirandong krisis sa lana ug ekonomiya.
Kini ang gikumpirma ni Ronelle J. Pama, ang Presidente sa Malaybalay City Bankers Association, Incorporated. Gibutyag ni Pama nga gikan sa 26 ka mga banking offices kaniadto, misaka na kini ngadto sa 27 karon sa dakbayan. Gilauman usab nga mosaka pa ngadto sa 30 ka mga bangko ang mag-operate sa syudad kung hingpit nang maaprubahan sa Bangko Sentral ng Pilipinas (BSP) ang aplikasyon sa dugang tulo ka mga bangko nga nagplano nga mosulod karong tuiga o sa sunod tuig.
Dugang pa niini, gipaambit ni Pama ang kasamtangang trend sa banking sector nga mao ang digitalization ug ang financial inclusion o ang pag-abot sa serbisyo ngadto sa mga ordinaryong Pilipino. Matud niya, sa pagkakaron lima pa lamang sa matag napulo (5 out of 10) ka mga Pilipino ang duna’y bank account.
Tungod niini, gi-engganyo sa maong opisyal ang publiko nga biyaan ang tradisyonal nga pagtago og kwarta sa unlan o kabinet nga daling makawatan o masunog, ug praktisan ang disiplina sa pagtigom sa bangko pinaagi sa Basic Deposit Account (BDA). Ubos niini nga programa sa BSP, mamahimo nang maka-open og bank account ang usa ka indibidwal sa kantidad nga 100 pesos paubos—diin ang uban member banks nagsugod lang sa singko pesos o zero balance—gamit lamang ang usa ka valid ID ug usa ka application form.
Gipasalig usab ni Pama nga mas segurado na ang pagpundo sa kwarta karon tungod kay ang insurance coverage sa Philippine Deposit Insurance Corporation (PDIC) misaka na ngadto sa 1 ka milyon ka pesos matag depositor gikan sa kanhi 500 mil pesos lamang.