Gisuspinde ni Presidente Ferdinand “Bongbong” Marcos Jr. ang excise tax sa produktong petrolyo isip tubag sa padayon nga pagsaka sa presyo sa lana nga resulta sa krisis sa Middle East ug sa pagsira sa Strait of Hormuz.
Sumala sa Pangulo, ang maong lakang nagtinguha nga mapagaan ang gasto sa mga motorista ug negosyo, ug maminusan ang epekto sa global oil crisis sa mga katawhan.
Base sa datos sa Department of Energy (DOE), ang suplay sa gasolina sa nasud moabot pa og kapin 50 ka adlaw, apan nagpabilin nga taas ang presyo sa krudo nga niabot na sa kapin $110 kada bariles.
Gilauman nga ang suspensyon sa excise tax makahatag og rollback sa presyo sa gasolina ug diesel sa mga sunod nga semana, nga dako og tabang sa transport sector ug sa mga konsumidor.
Ilalom sa pagdumala sa Department of Finance, ipatuman dayon ang maong polisiya ug magpabilin kini hangtod adunay bag-ong direktiba base sa lihok sa global market.
Ang maong lakang kabahin sa mas lapad nga plano sa gobyerno aron masiguro ang igong suplay sa lana ug mapadayon ang kalig-on sa ekonomiya sa tunga-tunga sa krisis.