Giduso sa Kamara de Representantes ang paggamit sa bilyon nga kita gikan sa Malampaya Deep Water Gas-to-Power Project aron pondohan ang pagtukod og strategic fuel reserves sa nasud.
Sumala kang House Minority Leader Marcelino Libanan, ang gobyerno kinahanglan mopahimulos sa royalties gikan sa proyekto aron matukod ang coastal petroleum storage facilities ubos sa Philippine National Oil Company.
Base sa pinakabag-o nga datos sa Budget of Expenditures and Sources of Financing (BESF), miabot na sa ₱200 bilyon ang nakolekta nga pondo gikan sa Malampaya gikan 2014 hangtod 2024, nga katugbang og ₱18.2 bilyon nga average kada tuig.
Gipasabot ni Libanan nga mas modako pa ang kita sa umaabot nga mga tuig human sa malampusong drilling sa duha ka bag-ong gas wells sa maong pasilidad.
Tungod niini, sumala sa mambabalaod nga ang royalties gigahin alang sa energy development angay kini gamiton aron mapalig-on ang kapasidad sa fuel storage sa Pilipinas.
Sakop sa maong proposal ang pagtipig sa mga importanteng produktong petrolyo sama sa diesel, gasolina, ug aviation fuel.
Pinaagi niini, gitinguha nga masiguro nga adunay igo ug andam nga suplay ang nasud kung adunay krisis sa enerhiya o kalit nga pagsaka sa presyo sa global nga merkado.Â