Gisuportahan nila Senators JV Ejercito ug Panfilo “Ping” Lacson ang desisyon ni Presidente Ferdinand Marcos Jr. nga ibalhin si Vince Dizon balik sa Department of Transportation (DOTr) ug itudlo si Giovanni “Bannoy” Lopez isip bag-ong kalihim sa Department of Public Works and Highways (DPWH).
Matud ni Ejercito, dili kini dakong babag sa nagpadayong pagsusi sa Senado sa gisugyot nga nasudnong badyet alang sa 2027, ilabina kay pamilyar na si Dizon sa operasyon sa DOTr ug sa mga proyekto sa transportasyon nga ilang gisuportahan.
Gilaoman usab ni Ejercito nga ipadayon ni Lopez ang mga reporma sa DPWH human sa isyu sa mga proyekto sa pagkontrol sa baha, lakip ang pagpapanubag sa mga nalambigit ug pagsiguro nga ang mga proyekto makahatag og dakong kaayohan sa ekonomiya ug serbisyo publiko.
Samtang, gipasiugda ni Lacson nga katungod sa Presidente ang pagpili sa mga kalihim sa iyang gabinete, ug iyang giila nga kwalipikado si Lopez sa pagpangulo sa DPWH samtang andam usab si Dizon sa pagbalik sa DOTr.
Dugang pa ni Ejercito, gilaoman niyang magkasinabot ang Senado ug House of Representatives sa mga pag-usab nga gikinahanglan sa 2027 national budget atol sa bicameral conference committee, human kini hisgotan sa plenaryo sa Senado sa Nobyembre 23.