MALAYBALAY CITY — Nagpabiling nagpahatag og pasidaan ang PAGASA Malaybalay ngadto sa publiko, ilabina sa sektor sa agrikultura, kalabot sa posibleng epekto sa El Niño phenomenon human kini opisyal nga gideklara sa nasod sugod niadtong Hunyo 9.
Sumala ni Weather Specialist Raul Montilla, bisan pa man kon nagsugod na ang ting-uwan dala sa Habagat (Southwest Monsoon), dako gihapon ang kahigayonan nga maapektuhan ang lalawigan sa El Niño. Gipasabot ni Montilla nga ang maong phenomenon nalambigit sa pag-init sa temperatura sa dagat ug dili direktang konektado sa naandan nga pagsugod sa ting-uwan.
Gilauman nga molungtad ang El Niño hangtod sa sayong bahin sa sunod tuig, ug posible pa kining mosamot kalubong o mokusog sa hinapos nga bahin ning tuiga. Hinuon, gipasalig sa PAGASA nga magpabiling “near normal” o kasarangan ang gidaghanon sa ulan nga masinati hangtod sa bulan sa Agosto base sa ilang climate outlook.
Tungod niini, nanawagan ang ahensya sa mga mag-uuma ug sa publiko nga kanunayng magsubay sa mga weather updates aron sayong mapangandaman ang unsa mang dautang epekto sa naghinatabang hulaw.