LOS ANGELES, USA — Masaligon ang MP Promotions CEO nga si Jas Mathur nga magpabilin gihapon nga usa ka dako ug record-breaking nga atraksyon ang gihulat nga rematch tali sa mga boxing legends nga sila si Manny Pacquiao ug Floyd Mayweather Jr., bisan pa man sa pagkasibog niini.
Gipahayag ni Mathur nga ang panag-atbang pag-usab sa duha mao gihapon ang dula nga gustong tan-awon sa publiko, ug kini gilaumang mahimong usa sa labing dako nga sporting events sa kasamtangang streaming era.
Bisan pa man sa pagduhaduha sa pipila ka boxing analysts tungod sa pangedaron sa duha — diin mag-50 anyos na si Mayweather samtang 48 anyos na si Pacquiao — gipahimug-atan ni Mathur nga dili kini magsilbing babag. Matud niya, nagpabilin gihapon ang ilang talagsaong personalidad ug dakong ngalan sa kalibutan sa boksing.