Gipanghimakak sa kampo ni Vice President Sara Duterte ang mga alegasyon nga na-disburse o nagasto ang P125 milyones nga confidential funds sulod lamang sa 24 oras.
Sumala kang Atty. Salvador Paolo Panelo Jr., abogado ni VP Sara, walay kamatuoran nga basehan ang akusasyon ni Ramil Madriaga nga nagpaila nga kanhing aide ug “bagman” sa Bise Presidente.
Matud sa kampo, bakak ang mga alegasyun ni Madriaga kung tan-awon ang iyang tinubdan, ug wala siya’y kalabotan sa confidential funds o bisan unsang posisyon isip empleyado ni VP Sara.
Gipasabot usab nga wala niini napresentar ang mga dokumento nga makasuporta sa pamahayag ni niini.
Gikuwestyon usab ni Atty. Panelo Jr. ang kredibilidad ni Madriaga, gumikan ang mga giingong ebidensya sama sa campaign photos, group Zoom meetings, ug video greeting sa iyang birthday, dili makapamatuod og tinuod nga koneksyon o transaksyon sa Bise Presidente.
Dugang pa sa abogado nga ang birthday greeting ni VP Sara kang Madriaga dili pasabot nga personal niya kaila ang maong tawo, gumikan recorded message ra kini nga gihangyo sa mga wala niya personal nga magkaila.
Samtang sa isyu sa bank waiver nga gipirmahan ni Madriaga, gipasabot sa kampo nga kini nagpakita lamang sa personal nga bank accounts sa maong indibidwal ug dili ebidensya sa bisan unsang relasyon sa Bise Presidente.