Nagmaya ug naghiusa ang nagkalain-laing P-pop artists sa pagpahalipay sa girl group nga BINI human sa ilang makasaysayanong debut performance sa Coachella Valley Music and Arts Festival didto sa California.
Pinaagi sa social media, nipaabot sa ilang garbo ug suporta ang mga kaubanan sa industriya sama sa SB19, BGYO, ALAMAT, ug HORI7ON. Matud pa sa mga P-pop idols, ang kalampusan sa BINI dili lang alang sa grupo, kondili usa ka dakong dungog alang sa tibuok musikang Pilipino sa tibuok kalibutan.
“Mabuhay ang Musikang Pilipino!” ang nahimong singgit sa kadaghanan samtang ilang gidayeg ang world-class nga talento nga gipakita sa grupo sa usa sa pinakadakong music stage sa Amerika.
Ang BINI mao ang labing unang Filipino pop group nga nakapasundayag sa Coachella, diin ilang gi-perform ang ilang mga hit songs sama sa “Pantropiko” ug “Salamin, Salamin.” Ang maong milestone giisip nga usa ka dakong pultahan nga naabli alang sa uban pang Pinoy artists aron mailhan pa og maayo sa global nga entablado.