Opisyal na nga nagpagawas og pamahayag ang National Commission on Indigenous Peoples (NCIP) Bukidnon Provincial Office aron kundenahon ang dili maayong paggamit sa lumadnong sinina ug mga accessories atol sa gipahigayon nga Lechon Festival niadtong Abril 16, 2026.
Sumala sa NCIP, nadawat nila ang mga report diin ang mga sagradong attire sa pito ka tribu sa Bukidnon gigamit lamang isip dekorasyon sa mga lechon exhibit, butang nga giisip nga pagpakaubos sa dignidad ug integridad sa maong kultura.
Gipahinumdoman sa ahensya ang mga organizers ug ang publiko nga ang maong mga butang dili lamang basta dekorasyon, kundi sagradong simbolo sa kasaysayan ug pagkatawo sa mga lumad.
Nanawagan usab ang NCIP og dugang pagmatngon ug koordinasyon sa ilang buhatan sa dili pa mogamit og bisan unsang elemento sa tribo sa mga publiko nga kalihukan aron malikayan ang pag-abuso o diskriminasyon sa tradisyon sa Bukidnon.
Subay niini, nanawagan si Bae Mamatbat, ang Indigenous People Mandatory Representative (IPMR) sa Bukidnon, nga pagasusihon og maayo ang mga aktibidad sa Kaamulan Festival aron malikayan ang kasamok ug paglapas sa kultura sa pito ka tribu.
Hugot nga gipdayag niini ang dako ang pagsupak sa paggamit sa ilang mga balaang accessories ngadto sa mga litson nga baboy sa milabayng aktibidad.
Matud ni Bae Mamatbat, usa kini ka dakong insulto sa ilang pagtuo tungod kay ang maong mga kabilin adunay lawom nga kahulugan ug kinahanglan pa kining agi-on sa ritwal sa mga Datu ug Bae sa dili pa gamiton.