Padayon nga gipangita sa National Bureau of Investigation o NBI ang mga indibidwal nga gituohang nagpaluyo sa pag-hack sa pipila ka government websites sa nasud.
Sumala kang NBI Director Melvin Matibag, natumbok na sa ahensya ang pipila ka mga tawo nga posibleng nalambigit sa maong cyber attack ug kasamtangang gisubay ang ilang pagkatawo aron mapanubag sila ubos sa balaod.
Gipadayag sa NBI nga ipadayon nila ang imbestigasyon ug kasuhan ang mga responsable tungod sa klarong paglapas sa balaod nga nalambigit sa pag-hack sa mga website sa gobyerno.
Kahinumduman, usa ka grupo nga gitawag og Nullsec Philippines ang miangkon nga sila ang responsable sa kausaban sa pipila ka bahin sa mga website sa gobyerno.
Aduna usab gibilin nga mga mensahe ang grupo nga nagpasidaan ug nagbatikos sa Senado.
Samtang, naapil usab sa susamang cyber attack ang website sa House of Representatives diin adunay mga mensahe nga nagpunting sa mga isyu sa korapsyon ug pagsalig sa publiko ngadto sa gobyerno.
Giklaro sa Cybercrime Investigation and Coordinating Center o CICC nga walay sensitibong datos nga nakuha sa mga hacker.
Ang naapektuhan lamang ang mga pampublikong website ug dili ang internal systems sa mga ahensya sa gobyerno.
Dugang sa CICC, tungod kay bukas sa publiko ang mga website, mas dali kini mahimong target sa mga kahuyang sa seguridad nga mahimong mapahimuslan sa mga cyber attacker.
Padayon karon ang imbestigasyon sa mga otoridad aron mahibal-an ang tibuok gilapdon sa pag-atake ug malikayan ang susamang insidente sa umaabot.