Gisugdan na ang imbestigasyon sa National Bureau of Investigation (NBI) kalabot sa mga gibutyag ni Ramil Madriaga nga giingong adunay assassination plot batok kang Presidente Ferdinand Marcos Jr..
Sumala ni Madriaga sa supplemental affidavit niini nga nagplano matud pa si kanhi Presidente Rodrigo Duterte og assassination ug kudeta batok sa kasamtangang Presidente Marcos kung dili kini mohawa sa puwesto pag-abot sa 2025.
Ang maong kontrobersyal nga pahayag gisumite sa House Committee on Justice nga nagpadayon sa impeachment hearing batok kang VP Sara Duterte.
Sumala ni NBI Director Atty. Melvin Matibag, giimbestigahan na sa buhatan ang tibuok detalye sa alegasyon aron masuta ang kamatuoran sa mgaong pamahayag.
Nalakip usab sa imbestigasyon ang una nga pamahayag ni Davao City Mayor Baste Duterte nga giingong “gusto lang nila ang ulo ni Marcos,” nga gipamulong sa paglunsad sa Reform Alliance for Good Governance and Accountability (RAGE Coalition) sa San Juan City.
Matud sa NBI chief, nga sa umaabot magpagawas sila og memorandum kalabot sa padayon nga imbestigasyon.
Aminado usab ang mga awtoridad nga seryoso ang maong mga pamahayag gumikan nga direkta nga nagatutok kini sa Presidente sa nasud.