Gibutyag karon sa usa ka kanhi opisyal sa Integrated Bar of the Philippines (IBP) nga ang korapsyon ug ang gitawag og bloated budget ang nag-unang hinungdan sa nag-ulbo nga utang sa nasud.
Sa pakighinabi sa Bombo Radyo Malaybalay, gipahayag ni Atty. Eddie Cuaresma, kanhi presidente sa IBP, nga bisan og nagkadako ang budget sa matag administrasyon, dili kini matumbasan sa kita sa gobyerno. Sumala ni Cuaresma, nagsalig lamang ang nasud sa service-driven economy samtang nagpabiling huyang ang sektor sa agrikultura ug industriya. Tungod niini, napugos ang gobyerno sa pagpangutang aron pondohan ang mga proyekto, apan duna’y dakong kabalaka nga kini mapunta lamang sa mga anomalya sama sa ghost projects.
Gipunting usab sa abogado nga ang maong problema miresulta sa kakuwang sa batakang serbisyo sama sa tambal sa mga ospital, classrooms, ug ang pag-ubos sa kalidad sa edukasyon. Samtang, kalabot sa isyu sa impeachment batok sa Bise Presidente, gipasabot ni Cuaresma nga gikinahanglan ang lig-ong ebidensya ug dili lamang ibase sa pamolitika ang pagpasaka og kaso batok sa bisan kinsang opisyal nga nalambigit sa korapsyon.