Gipasalig sa militar nga madawat sa mga informants ang kantidad nga P5.3-M nga ganti sa pagtudlo sa gikahimutangan sa walhong grupo.
Kini ang gipadayag ni Lt. Col. George R. Jallorina, Commanding Officer sa 8th Infantry Battalion, human makatabang ang mga informants sa pagtultol sa gikahimutangan sa usa ka walhong armadong grupo sa Bukidnon diin hingpit nga napukan ug napatay ang usa sa labing taas nga opisyal lakip na ang laing 3 ka miyembro niini.
Matud ni Lt. Col. Jallorina, mismo ang mga residente sa hilit nga mga lugar ang miduol sa militar ug naghatag og impormasyon. Busa gikinahanglan usab nga sekreto ang paghatag sa ganti aron mapanalipdan ang seguridad sa mga informants.
Gipasabot usab sa opisyal nga dili ipahibalo kung kinsa ang mga informants nga makadawat sa ganti, ilabina aron malikayan nga balikan sila sa nahibiling mga sakop sa armadong grupo.
Samtang, gilauman sa militar nga mahimong ideklara ang Bukidnon isip Stable Internal Peace and Security (SIPS) human makompleto ang proseso sa Provinciall ug Regional Peace and Order Council.