Gipamugos ni House prosecution spokesperson ug kanhi kongresista Robert Ace Barbers ang kamahinungdanon sa mga rekord, transcript ug report gikan sa House impeachment hearings human gibasura sa Korte Suprema ang mga petisyon nga nagkwestiyon sa proseso sa impeachment ug sa gihimong hearings sa House Committee on Justice.
Matud ni Barbers, ang desisyon sa Korte Suprema nagpasabot nga wala nay makababag sa pagpadayon sa impeachment trial gamit ang mga rekord gikan sa House of Representatives isip ebidensya sa impeachment court.
Gibutyag usab niini nga mitumaw ang maong isyu human mosupak ang depensa sa pagdawat sa impeachment court sa mga rekord gikan sa House of Representatives tungod kay giingong adunay gihulat nga resolusyon sa Korte Suprema.
Matud ni Barbers, mahimong ilatid sa prosekusyon isip ebidensya ang mga rekord, transcript, pamahayag ug ubang dokumento gikan sa House of Representatives aron mahimong basihan sa impeachment court sa paghusay sa kaso.