Posibleng dili lamang paglapas sa sub judice rules kundi mahimo usab nga mosangpot sa contempt of court ang mga pahayag ni Vice President Sara Duterte batok sa impeachment proceedings, sumala kang Atty. Benjamin Tolosa, legal spokesperson sa prosecution.
Matud ni Tolosa, dili kini unang higayon nga nakapagawas og mga pahayag ang bise presidente nga gikuwestiyon ang integridad sa impeachment process.
Gikuwestiyon usab ni Tolosa ang ubang pahayag nga giingong naghulagway nga ginadula-dulaan lamang ang impeachment proceedings ug gimaniobra sa mga senador.
Sumala pa niya, ang maong mga pahayag angay tan-awon isip posibleng mas seryosong paglapas sa sub judice rules.
Gipasabot ni Tolosa nga mahimong makaapekto sa pagsalig sa publiko sa impeachment process ang padayong pagkuwestiyon sa proseso ug ebidensiya.
Gipasiugda ni Tolosa nga kung higpit ang pagpatuman sa mga lagda sa impeachment proceedings, kinahanglan parehas usab ang pagpatuman niini sa tanang partido.