Padayon ang kabalaka sa mga drayber sa transportasyon tungod sa sunod-sunod nga pagsaka sa presyo sa petrolyo, ilabina nga nagbabadya na usab ang dakong pagtaas sa presyo sa diesel ug gasolina sa umaabot nga semana.
Matud sa drayber nga si Rafael Vista, dako ang epekto sa mahal nga gasolina sa ilang adlaw-adlaw nga panginabuhi, ilabina kay limitado lamang ang ilang kita samtang kinahanglan pa nilang gastohan ang maintenance sa ilang sakyanan ug uban pang panginahanglan sa pamilya.
Gibutyag usab ni Vista nga lisod usab alang kanila ang pagpataas sa plete tungod kay maapektuhan usab ang mga pasahero nga naglisod usab sa ilang panginabuhi.
Nanawagan usab si Vista sa gobyerno ang pagpamenos sa presyo sa gasolina ug paghatag og hustong ayuda alang sa mga drayber, ilabina sa Mindanao, aron matabangan sila sa epekto sa padayon nga pagsaka sa presyo sa petrolyo.