Mga ballistic missile sa Iran, naharang sa militar sa US sa Middle East

Gisumpo ug naharang sa militar sa Estados Unidos (US) ang pipila ka ballistic missile nga gipalupad sa Iran batok sa ilang mga base ug sundalo sa Middle East.

Sumala sa US Central Command (CENTCOM), usa ka surprise attack ang gihimo sa Islamic Revolutionary Guard Corps (IRGC) sa Iran. Apan gipasalig sa CENTCOM nga nasumpo ug naharang sa ilang defense systems ang tanang mga missile nga walay gikatahong nakalas o naangol.

Tungod sa maong insidente, naputol ang pila ka adlaw nga paghunong sa panag-away tali sa duha ka nasod kasunod sa mga tensyon sa Middle East ug sa Strait of Hormuz.

Bisan pa man sa maong pagpalupad og missile, nagpadayon gihapon ang mga diplomatikong panaghisgot sa paglaum nga makab-ot ang kasabotan alang sa kalinaw.