Nagatuo ang usa sa mga nagpasaka og kaso batok sa kanhi Pangulong Rodrigo Duterte sa International Criminal Court nga igo na ang mga testimoniya sa self-confessed hitman nga sila Edgar Matobato ug Arturo Lascañas aron mapamatud-an ang paglungtad sa kontrobersyal nga Davao Death Squad (DDS).
Kini nga grupo usa ka paramilitary nga giingong responsable sa mga extrajudicial killings sa panahon ni Duterte, isip alkalde sa Davao City ug sa nahimo kining pangulo sa Pilipinas.
Ang duha ka testigo mismo miangkon nga miyembro sila sa maong grupo.
Gibutyag ni kanhi Magdalo Rep. Garry Alejano nga aduna’y lawom nga personal nga kahibalo ug kasinatian ang duha, gikan pa sa panahon ni Duterte isip alkalde, lakip ang personal nga pagpatay sa pipila ka drug suspects ug pag-apil sa ubang police operations.
Nasayud usab sila sa sistema sa DDS, sama sa bayad sa mga miyembro ug lista sa mga target sa operasyon.
Bisan pa man si Matobato wala mag-apil sa national level sa drug war, makahatag kini og kasayuran sa sistema nga gigamit sa Davao City, nga gisundan usab sa tibuok nasod sa panahon sa pagkapangulo ni Duterte.
Si Lascañas, nga kanhing pulis, diin makapakapamatuod usab kung giunsa ang pag-apil sa kapulisan sa serye sa mga patayan.
Ang duha ka testigo karon anaas na sa kostudiya sa ICC ug posibleng motestigo batok sa kanhi pangulo ug sa iyang mga co-perpetrator sa umaabot nga hearing.
Ang kaso una nga gipasaka ni Alejano ug kanhi Sen. Antonio Trillanes niadtong Abril 2017, diin giakusahan si Duterte sa mass murder o extrajudicial executions nga sulod sa kaso nga crimes against humanity.
Gisundan kini sa usa pa ka communication niadtong Hunyo 2017.