Mobalik sa House of Representatives karong Lunes, Enero 26, ang Makabayan Bloc uban ang mga complainant sa ikaduhang impeachment complaint batok kang Pangulong Ferdinand Marcos Jr. aron pormal kining dawaton sa Office of the House Secretary General nga gipangulohan ni Cheloy Garafil.
Sumala ni ACT Teachers Rep. Antonio Tinio, katuyoan sa maong lakang nga masiguro nga wala na’y mahimong rason para dili dawaton ang reklamo, human ang giingong pagbalik na ni Garafil sa iyang trabaho. Gipanghingusgan sa grupo nga hunongon na ang gitawag nila nga “delaying tactics” ug tahuron ang panawagan sa Konstitusyon alang sa tulubagon (accountability).
Target sa Makabayan Bloc nga mahilakip ang maong reklamo sa Order of Business sa pagbalik sa sesyon sa Kamara karong Lunes sa hapon.
Niadtong miaging semana, gipasaka na sa mga progresibong grupo ang impeachment complaint nga nag-akusar kang Marcos Jr. og “betrayal of public trust,” apan wala kini dawata tungod sa rason nga wala’y awtoridad ang nidawat niini. Apan alang sa mga complainant, giisip na nga “deemed filed” ang reklamo bisan wala si Garafil, sanglit wala man kinahanglana sa Konstitusyon ang personal nga pagdawat sa secretary general.
Nisuporta usab si ML Party-list Rep. Leila de Lima sa baruganan sa Makabayan Bloc ug niingon nga wala’y bisan kinsa sa Office of the Secretary General ang adunay gahum nga mobalibad sa usa ka beripikadong impeachment complaint nga adunay endorsement sa mga magbabalaod.