Gibasura sa Court of Appeals (CA) 3rd Division ang petisyon ni kanhi Negros Oriental Congressman Arnolfo Teves Jr. nga nagkwestiyon sa search warrants nga gi-isyu batok kaniya ug sa iyang mga anak niadtong 2023.
Gideklarar sa korte nga balido ang maong mga warrant ug legal ang pagkasakmit sa mga armas, bala, ug pabuto gikan sa panimalay niini.
Napakyas si Teves sa pagpamatuod nga adunay “grave abuse of discretion” diin gisalikway sa CA ang rason sa kanhi opisyal nga dili katuohan ang mga saksi, gipasabot sa korte nga nasunod ang saktong proseso ug legal ang gihimong pagpangronda sa tibuok panimalay niini.
Nag-atubang karun si Teves sa mas bug-at nga mga kaso, lakip na ang multiple murder tungod sa kamatayon ni kanhi Negros Oriental Governor Roel Degamo ug siyam ka uban pa.
Tungod sa desisyon sa CA, magpabiling lig-on nga ebidensya batok kaniya ang mga nakumpiskang kagamitan sa gipahigayon nga search operations.