Gipahayag ni lead prosecutor ug Batangas Representative Gerville Luistro nga andam silang mosunod sa mando sa Korte Suprema kalabot sa isyu sa voting threshold sa impeachment trial, bisan pa nga nagbarog ang ilang posisyon nga Senado lamang ang angay modesisyon niini.
Gipasabot ni Luistro nga, ubos sa doktrina sa political question, ang interpretasyon sa voting threshold sakop sa gahum sa Senado isip impeachment court ug dili angay panghilabtan sa ubang sangay sa gobyerno. Bisan pa niini, giila niya ang katungod sa Korte Suprema sa paghubad sa mga balaod ug nagpahayag sa ilang kaandam nga mosumite sa gikinahanglang komento sa petisyon.
Sa laing bahin, konektado kini sa petisyon nila Senators Robin Padilla ug Bong Go nga nagkuwestiyon sa interpretasyon sa impeachment voting threshold, diin nangayo ang Korte Suprema og komento gikan sa mga hingtungdang partido.